攪 TIPS 的意義 ─ 第一集

近年自己創業，睇人創業，參加創業比賽，睇人參加創業比賽，得出的結論是創業難，大家都明。條橋得，但又執行唔到。執行到的，可能又入行門檻太低，容易被抄。條橋得，執行到嘅，又怕唔夠錢。ok ok, 條橋得，執行到，又揾有錢嘅，可能最後死於分贜不勻，股東反目。就算你係天生創業狂，有齊適合創業的性格，甚麼肯堅持，有見識，但你天時地利唔企你嗰一邊，都係講乜都冇用。打個直接的比喻，參加帆船比賽，緃使你有最強團隊，有一隻最堅的船，唯獨冇風，咁之後大家都知詳嘢事。

 

講到創業的風，我稱為一些外力，一些可推你向前行的力量，那可以是一個簡單的建議，一個給你生意的機會，或一筆適時的投資。不竟現今世代不同以前，閉門做車已不是一個好方法，反而把想做車這個意念講出來，共享一齊做，可能得到意想不到的效果。意念要提高知名度有好多方法，參加創業比賽是一個途徑，等於想做明星，冇理由唔參加港姐一樣。問題是現在創業比賽攪到好似玩遊戲咁，想贏比賽一定要像考試般識捉路，而忘卻了為甚麼攪生意的初衷。

 

如果真的做一個統計，在創業比賽出現得最多的字，我敢打賭是“改變世界” 這個terms，或者感覺再cool 啲的disruptive innovation, 顛覆性創新。這幾年大家太受已故教主喬布斯所影響，覺得自己創業時，點都加啲喬教主的風格進去，一定有幾張apple feel 的投影片，同埋左一句破壞舊有模式，右一句征服全世界，講這些豪情壯語唔係話唔好，但都要睇睇現實環境，自己手頭上有乜資源。如果發現自己還是只得一個概念，一個客都未揾到時，還是正如lean startup 作者所講idea is cheap， 歉虛一點整個minimum viable product 出來試吓水温。

 

所以創業第一件事並不是改變世界，而是改變世界怎樣看你。而且創業開始時，不要先急著做喬布斯，何不先由喬寶寶出發。

 

至於為何大家也這麼喜歡 "談" 改變世界，下次傾。

 

mark kong